ҚБМ: Зейнет демалысы – өмірдің жаңа белесі

Қос цех ұжымы өлке мұнайын игеруге елеулі үлес қосқан әріптестерге алғыс айтып, құрмет көрсетті.

Ералин Әбдіқадіровтың қара алтын өндіру саласындағы жалпы еңбек өтілі 40 жылға жуықтайды. Осы уақыт ішінде ол өндірісте жөндеуші, жүргізуші, механик, шебер сияқты бірқатар жауапты қызмет атқарған. Соңғы 10 жылдан астам уақыт көлемінде ол Қаражанбаста көтергіш жүргізушісі боп табан аудармай еңбек етіп, ұңғымаларды күрделі және жерасты жөндеу жұмыстарының басы-қасынан табылған білікті маман.

Нұрберген Альджанов та ғұмырының ширек ғасырын Қаражанбасқа арнаған. Ол газ цехындағы мұнайды жылыту, айдау және т.б. қызмет атқаратын пештердің үздіксіз жұмыс істеуін қамтамасыз етеді. Цех өміріне белсенді араласатын Нұрберген әріптестеріне үнемі ақылын айтып, тәжірибесімен бөлісіп отырады.

Қаражанбас кен орны – талай жас маманды білікті мұнайшы етіп шығарған қайнаған еңбек ордасы. Қос әріптес соңғы вахтасын қимастықпен өткізіп, сүйікті жұмыс орнын ізбасарларға сеніммен тапсырды. Олар жас та жігерлі жұмысшылар жиналған компанияның алдағы уақытта биік белестерді бағындыратынына сенімді.